Көрісу – қыстан аман шығып, жаңа өмірге, жаңа күнге аяқ басқан халықтың шүкіршілік етуінен туған мереке. Қырдағы ел ойдағы елмен араласып, бір-бірімен аман қауышқанына қуанады. Жасы кішілер үлкенге көрісіп, құрмет көрсетеді. Өйткені, наурызда табиғат жаңарып, халық жаңа өмірге ізгі қадаммен аяқ басады. Бұрынғы өкпе-реніш ұмытылып, тыныштыққа, берекелі тірлікке шүкіршілік етеді. Көрісу – қазақ халқының ізеттілік пен көрегенділікке, ауызбіршілік пен бауырмалдылыққа бастайтын ерекше үрдістерінің бірі. Осыған орай, 2020 жылдың 12 наурыз күні В.Маяковский атындағы қалалық орталық кітапханасында «Көрісу-имандылыққа негіз салған мереке» атты дивертисмент кеші өткізілді.